વાંસદાના નરેશ તુમડાની ભારતીય બ્લાઇન્ડ ક્રિકેટ ટીમમાં પસંદગી

એશિયા કપમાં આંતરરાષ્ટ્રીય સ્તરે કરશે ભારતનું પ્રતિનિધિત્વ, સમગ્ર ગુજરાતમાં ખુશીની લાગણી

વાંસદા: નવસારી જિલ્લાના વાંસદા તાલુકાના ખાટાઆંબા ગામના યુવા પ્રતિભાશાળી ખેલાડી નરેશ તુમડાએ રમતગમત ક્ષેત્રે ગૌરવપૂર્ણ સિદ્ધિ હાંસલ કરી છે. તેમની ભારતીય બ્લાઇન્ડ ક્રિકેટ ટીમમાં પસંદગી થતાં સમગ્ર વાંસદા પંથક સહિત ગુજરાતમાં આનંદ અને ગૌરવની લાગણી પ્રસરી છે.

નરેશ તુમડા આગામી 15થી 20 નવેમ્બર દરમિયાન બાંગ્લાદેશમાં યોજાનારા બ્લાઇન્ડ ક્રિકેટ એશિયા કપ-2026માં ભારતીય ટીમનું પ્રતિનિધિત્વ કરશે. આંતરરાષ્ટ્રીય સ્તરે યોજાનારી આ સ્પર્ધામાં ભારત તરફથી રમવાની તક મળવી તેમના માટે ગૌરવપૂર્ણ સિદ્ધિ છે.

ખાસ વાત એ છે કે દૃષ્ટિની મર્યાદાઓ વચ્ચે પણ રમતગમત પ્રત્યેનો ઉત્સાહ, મહેનત, લગન અને સતત સંઘર્ષ દ્વારા નરેશ તુમડાએ આ સફળતા મેળવી છે. તેમની આ સિદ્ધિ અન્ય યુવાનો અને દિવ્યાંગ ખેલાડીઓ માટે પણ પ્રેરણારૂપ બની રહેશે.

ખાટાઆંબા ગામના નરેશ તુમડાની ભારતીય ટીમમાં પસંદગીથી ગામ, તાલુકા અને સમગ્ર નવસારી જિલ્લાનું નામ રાષ્ટ્રીય સ્તરે રોશન થયું છે. સ્થાનિક રમતપ્રેમીઓ અને શુભેચ્છકોએ તેમને અભિનંદન પાઠવી એશિયા કપમાં ભારતીય ટીમના શ્રેષ્ઠ પ્રદર્શન માટે શુભકામનાઓ વ્યક્ત કરી છે.

ખાટાઆંબા ગામના આ ખેલાડીની સિદ્ધિ ખરેખર ગુજરાત માટે ગૌરવની ક્ષણ છે. હવે સૌની નજર બાંગ્લાદેશમાં યોજાનારા એશિયા કપમાં નરેશ તુમડાના પ્રદર્શન પર રહેશે.