૭૦મી અખિલ ભારતીય શાળાકીય હોકી સ્પર્ધામાં ડાંગ જિલ્લાની અંડર-૧૯ બહેનોની ટીમે રાજ્યકક્ષાએ ગોલ્ડ મેડલ જીત્યો.

૭૦મી અખિલ ભારતીય શાળાકીય હોકી સ્પર્ધામાં ડાંગ જિલ્લાની અંડર-૧૯ બહેનોની ટીમે રાજ્યકક્ષાએ ગોલ્ડ મેડલ જીત્યો.

સાપુતારા ખાતે યોજાયેલી હોકી ટુર્નામેન્ટમાં ડાંગની દીકરીઓએ ઉત્કૃષ્ટ પ્રદર્શન કરી જિલ્લાનું ગૌરવ વધાર્યું

સાપુતારા ખાતે ૭૦મી અખિલ ભારતીય શાળાકીય હોકી સ્પર્ધા અંતર્ગત આયોજિત રાજ્યકક્ષાની હોકી ટુર્નામેન્ટમાં ડાંગ જિલ્લાની અંડર-૧૯ બહેનોની ટીમે શાનદાર રમતનું પ્રદર્શન કરીને પ્રથમ સ્થાન પ્રાપ્ત કર્યું છે. ટીમે ફાઇનલમાં વિજય મેળવી ગોલ્ડ મેડલ પોતાના નામે કર્યો હતો.

સમગ્ર સ્પર્ધા દરમિયાન ડાંગની ખેલાડીઓએ ઉત્તમ ટીમવર્ક, રમતકૌશલ્ય, સંકલન અને ખેલદિલીનું પ્રદર્શન કરીને ચેમ્પિયનશિપ હાંસલ કરી હતી. આ સિદ્ધિથી ડાંગ જિલ્લાનું નામ રમતગમત ક્ષેત્રે ગૌરવભેર ઉજ્જવળ બન્યું છે.

આ સફળતા બદલ ડાંગ જિલ્લા રમત વિકાસ અધિકારી શ્રી અલ્કેશભાઈ પટેલે વિજેતા ખેલાડીઓ, કોચ અને સમગ્ર સપોર્ટ સ્ટાફને અભિનંદન પાઠવ્યા હતા. ટીમના પ્રેરણાસ્ત્રોત અને માર્ગદર્શક પરમ પૂજ્ય પી.પી. સ્વામીજીએ પણ ખેલાડીઓને આશીર્વાદ આપી તેમનો ઉત્સાહ વધાર્યો હતો.

કોચ અને ટ્રેનર્સના માર્ગદર્શન હેઠળ તૈયાર થયેલી આ ટીમે આગામી સમયમાં રાષ્ટ્રીય કક્ષાએ ગુજરાત રાજ્ય અને ડાંગ જિલ્લાનું પ્રતિનિધિત્વ કરીને વધુ શ્રેષ્ઠ પ્રદર્શન કરવાની આશા જગાવી છે.

ડાંગ જિલ્લાની દીકરીઓની આ સિદ્ધિ અન્ય યુવા ખેલાડીઓ માટે પ્રેરણારૂપ બની છે. સમગ્ર જિલ્લામાં આ સફળતાને લઈને આનંદ અને ગૌરવની લાગણી પ્રસરી છે.