ખેલ મહાકુંભ 2026માં જનતા માધ્યમિક શાળા ખેરગામનો શાનદાર દેખાવ.

ખેલ મહાકુંભ 2026માં જનતા માધ્યમિક શાળા ખેરગામનો શાનદાર દેખાવ

ખેરગામ: ખેરગામ તાલુકા કક્ષાના ખેલ મહાકુંભ 2026માં જનતા માધ્યમિક શાળા ખેરગામના રમતવીરોએ વિવિધ સ્પર્ધાઓમાં ઉત્કૃષ્ટ પ્રદર્શન કરી શાળાનું તેમજ ખેરગામ તાલુકાનું ગૌરવ વધાર્યું છે.

ગીતામંદિર હાઈસ્કૂલ, પાર્ટી મુકામે તા. 28 સપ્ટેમ્બર 2026ના રોજ યોજાયેલી રસ્સા ખેંચ સ્પર્ધામાં ઓપન એજ ગ્રુપમાં શાળાની ભાઈઓની ટીમ અને બહેનોની ટીમે પ્રથમ ક્રમ પ્રાપ્ત કર્યો હતો. જ્યારે અંડર-17માં બહેનોની ટીમે દ્વિતીય અને ભાઈઓની ટીમે તૃતીય ક્રમ મેળવ્યો હતો.

ત્યારબાદ તા. 1 ઓક્ટોબર 2026ના રોજ યોજાયેલી એથ્લેટિક્સ સ્પર્ધામાં પણ શાળાના રમતવીરોએ નોંધપાત્ર સફળતા મેળવી હતી. અંડર-17 બહેનોમાં ધારા હળપતિએ 200 મીટર અને 400 મીટર દોડમાં પ્રથમ ક્રમ મેળવ્યો હતો. અંડર-17 ભાઈઓમાં મેહુલ પટેલે લાંબી કૂદમાં, અલુક રાઉતે 1500 મીટરમાં, મયુર ગાયકવાડે 800 મીટરમાં અને આર્યન પટેલે 5000 મીટર દોડમાં પ્રથમ ક્રમ પ્રાપ્ત કર્યો હતો.

આ ઉપરાંત તનુશ્રી રાઠોડે ગોળા ફેંકમાં ત્રીજો અને ચક્ર ફેંકમાં બીજો ક્રમ મેળવ્યો હતો. ભાઈઓમાં નિકુલ વસાવાએ 100 મીટરમાં દ્વિતીય, પવાર યાકુબે 100 મીટરમાં તૃતીય, દિગ્વિજય મહાલાએ 200 મીટરમાં દ્વિતીય અને તનય પટેલે ચક્ર ફેંકમાં દ્વિતીય ક્રમ પ્રાપ્ત કર્યો હતો.

વિદ્યાર્થીઓના આ ઉત્કૃષ્ટ પ્રદર્શન બદલ જનતા માધ્યમિક શાળા ખેરગામ પરિવાર અને સંચાલક મંડળ દ્વારા તમામ રમતવીરોને હાર્દિક અભિનંદન પાઠવવામાં આવ્યા છે. સાથે જ વિદ્યાર્થીઓને સતત માર્ગદર્શન અને તાલીમ આપવા બદલ શાળાના વ્યાયામ શિક્ષક શ્રી કેતનભાઈ પટેલને પણ વિશેષ અભિનંદન પાઠવવામાં આવ્યા છે.

આ સફળતા વિદ્યાર્થીઓની મહેનત, રમત પ્રત્યેની લગન અને શિક્ષકોના માર્ગદર્શનનું ઉત્તમ પરિણામ છે. જનતા માધ્યમિક શાળા ખેરગામના આ પ્રતિભાશાળી રમતવીરો ભવિષ્યમાં પણ તાલુકા, જિલ્લા અને રાજ્ય કક્ષાએ શાળાનું નામ રોશન કરે તેવી સૌએ શુભેચ્છા પાઠવી છે. 🏆👏