નવસારી જિલ્લા પ્રાથમિક શિક્ષક સંઘની કારોબારી સભા યોજાઈ

શિક્ષણક્ષેત્રે ઉત્કૃષ્ટ કામગીરી કરનાર શિક્ષકોનું સન્માન, નિવૃત્ત હોદ્દેદારોને વિદાય સન્માન

જલાલપોર, તા. ૨૨ ઓગસ્ટ, ૨૦૨૬: નવસારી જિલ્લા પ્રાથમિક શિક્ષક સંઘની કારોબારી સભા શનિવારે જલાલપોર કન્યાશાળા, જલાલપોરના સભાખંડ ખાતે જિલ્લા પ્રાથમિક શિક્ષક સંઘના પ્રમુખશ્રી અજુવેન્દ્ર સુમનભાઈ પટેલની અધ્યક્ષતામાં યોજાઈ હતી.

કાર્યક્રમની શરૂઆત જલાલપોર કન્યાશાળાની દીકરીઓ દ્વારા પ્રાર્થના અને સ્વાગતગીતની રજૂઆતથી થઈ હતી. જલાલપોર તાલુકા પ્રાથમિક શિક્ષક સંઘ દ્વારા જિલ્લા પ્રાથમિક શિક્ષક સંઘના હોદ્દેદારો તેમજ વિવિધ ઘટક સંઘોના પ્રમુખશ્રીઓનું પુષ્પગુચ્છ અર્પણ કરી સ્વાગત કરવામાં આવ્યું હતું. તમામ કારોબારી સભ્યોની સરભરા અને વ્યવસ્થામાં જલાલપોર તાલુકા પ્રાથમિક શિક્ષક સંઘના પ્રમુખશ્રી નિલેશભાઈ પટેલ તથા તેમની સમગ્ર ટીમે ઉત્સાહપૂર્વક કામગીરી કરી હતી.

કારોબારી સભામાં જિલ્લા પ્રાથમિક શિક્ષક સંઘના હોદ્દેદારો તથા કારોબારી સભ્યો ઉપસ્થિત રહ્યા હતા. બેઠક દરમિયાન શિક્ષકોના હિત, સંગઠનાત્મક કામગીરી, શૈક્ષણિક ગુણવત્તા અને સામાજિક જવાબદારી સાથે સંકળાયેલા વિવિધ મુદ્દાઓ પર વિસ્તૃત ચર્ચા-વિચારણા કરવામાં આવી હતી.

સભાની શરૂઆતમાં ગત કારોબારી સભાનું પ્રોસિડીંગ જિલ્લા મહામંત્રીશ્રી હિતેશભાઈ પટેલ દ્વારા વંચાણે લઈ બહાલ રાખવામાં આવ્યું હતું. ત્યારબાદ જિલ્લા તથા તાલુકા કક્ષાના વિવિધ અહેવાલોની રજૂઆત કરવામાં આવી હતી.

વાંસદા તાલુકા પ્રાથમિક શિક્ષક સંઘના પ્રમુખશ્રી ભરતભાઈ થોરાત, ખેરગામ તાલુકા પ્રાથમિક શિક્ષક સંઘના પ્રમુખશ્રી દિવ્યેશકુમાર ચૌહાણ, નવસારી તાલુકા પ્રાથમિક શિક્ષક સંઘના પ્રમુખશ્રી હેમંતસિંહ ચૌહાણ, ગણદેવી તાલુકા પ્રાથમિક શિક્ષક સંઘના પ્રમુખશ્રી કલ્પેશકુમાર ટંડેલ, જલાલપોર તાલુકા પ્રાથમિક શિક્ષક સંઘના પ્રમુખશ્રી નિલેશભાઈ પટેલ તથા ચીખલી તાલુકા પ્રાથમિક શિક્ષક સંઘના પ્રમુખશ્રી હિતેશકુમાર પટેલ દ્વારા પોતાના તાલુકાના અહેવાલો રજૂ કરવામાં આવ્યા હતા.

કારોબારી સભામાં જિલ્લા તથા રાજ્ય કક્ષાએ યોજાયેલા વિવિધ ધરણા કાર્યક્રમોના અહેવાલ અંગે ચર્ચા કરવામાં આવી હતી. ઉપરાંત, નવસારી જિલ્લામાં પૂરથી અસરગ્રસ્ત વિસ્તારો માટે શિક્ષકો દ્વારા કરવામાં આવેલા સ્વૈચ્છિક ફાળાની જમા થયેલી રકમનો અહેવાલ જિલ્લા ખજાનચીશ્રી ભાવેશભાઈ ટંડેલ દ્વારા રજૂ કરવામાં આવ્યો હતો.

એપ્રિલ-૨૦૨૬થી જુલાઈ-૨૦૨૬ દરમિયાન થયેલા ખર્ચને મંજૂરી આપવા અંગેની દરખાસ્ત જિલ્લા પ્રમુખશ્રી અજુવેન્દ્ર પટેલ દ્વારા રજૂ કરવામાં આવી હતી. પૂરગ્રસ્તોને સહાય પહોંચાડવા માટેની નીતિ તેમજ સહાય સંબંધિત વિવિધ બાબતો અંગે પણ સભામાં ચર્ચા-વિચારણા કરવામાં આવી હતી.

આગામી સમયમાં શૈક્ષણિક ચિંતન શિબિરનું આયોજન કરવા અંગેનો મુદ્દો નવસારી તાલુકા પ્રાથમિક શિક્ષક સંઘના પ્રમુખશ્રી હેમંતસિંહ ચૌહાણ દ્વારા રજૂ કરવામાં આવ્યો હતો. પ્રમુખસ્થાનેથી રજૂ થયેલા વિવિધ કામો અંગે પણ સભામાં ચર્ચા કરવામાં આવી હતી.

શિક્ષણક્ષેત્રે ઉત્કૃષ્ટ કામગીરી કરનાર શિક્ષકોનું સન્માન

કારોબારી સભા દરમિયાન શિક્ષણક્ષેત્રે ઉત્કૃષ્ટ કામગીરી કરનાર શિક્ષકોનું મોમેન્ટો અર્પણ કરી સન્માન કરવામાં આવ્યું હતું. વિદ્યાર્થીઓના સર્વાંગી વિકાસ, શૈક્ષણિક ગુણવત્તા તથા શિક્ષણક્ષેત્રે નોંધપાત્ર યોગદાન બદલ શિક્ષકોને બિરદાવવામાં આવ્યા હતા.

નિવૃત્ત હોદ્દેદારોનું વિદાય સન્માન

આ પ્રસંગે જલાલપોર તાલુકા પ્રાથમિક શિક્ષક સંઘના પૂર્વ પ્રમુખશ્રી કિરણભાઈ પટેલ તથા જિલ્લા સંઘના પૂર્વ ખજાનચીશ્રી મહેન્દ્રભાઈ પટેલનું સાલ ઓઢાડી સન્માન કરવામાં આવ્યું હતું. સંઘની કામગીરીમાં તેમના લાંબા સમયના યોગદાન અને સેવાઓને યાદ કરી તેમના પ્રત્યે કૃતજ્ઞતા વ્યક્ત કરવામાં આવી હતી.

સન્માન સમારોહ દ્વારા શિક્ષણક્ષેત્રે નિષ્ઠાપૂર્વક સેવા આપતા શિક્ષકોને પ્રોત્સાહન મળ્યું હતું, જ્યારે સંઘની કામગીરીમાં લાંબા સમય સુધી યોગદાન આપનાર પૂર્વ હોદ્દેદારો પ્રત્યે સન્માન અને આભારની લાગણી વ્યક્ત કરવામાં આવી હતી.

કારોબારી સભાના અંતે જિલ્લા કોષાધ્યક્ષશ્રી ચંદ્રકાંતભાઈ ગાયકવાડ દ્વારા આભારવિધિ કરવામાં આવી હતી અને ત્યારબાદ સભાનું સમાપન કરવામાં આવ્યું હતું.

નવસારી જિલ્લા પ્રાથમિક શિક્ષક સંઘની આ કારોબારી સભા શિક્ષકોના હિત, સંગઠનની મજબૂતી, શૈક્ષણિક ગુણવત્તા તથા સામાજિક જવાબદારીના સંકલ્પ સાથે મહત્વપૂર્ણ બની રહી હતી.