ચીખલી તાલુકાની અંબાચ શાળાથી MBBS સુધીની સફર: તન્મય પટેલ બન્યો ડૉક્ટર
ચીખલી તાલુકાના કાકડવેલ ગામના વતની આદિવાસી શિક્ષક દંપતીનો પુત્ર ડૉક્ટર બની સમાજ માટે ગૌરવનું પ્રતિક બન્યો છે. અંબાચ પ્રાથમિક શાળામાં ફરજ બજાવતા શિક્ષક દંપતી શ્રી ઈશ્વરભાઈ પટેલ અને શ્રીમતી સરસ્વતીબેન પટેલના મોટા પુત્ર તન્મય પટેલે પોતાની મહેનત અને લગનના બળ પર ડૉક્ટર બની અનોખી સિદ્ધિ હાંસલ કરી છે.
ડૉ. તન્મય પટેલે ધોરણ 1 થી 8 સુધીનું પ્રાથમિક શિક્ષણ અંબાચ પ્રાથમિક શાળામાં જ પ્રાપ્ત કર્યું હતું. હાલ આ જ શાળાની બે દીકરીઓ પણ MBBS અભ્યાસ કરી રહી છે, જે સરકારી શાળાઓ પ્રત્યે વિશ્વાસ વધારતું ઉત્તમ ઉદાહરણ છે.
આજે તા. 17 એપ્રિલ, 2026ના રોજ GMERS મેડિકલ કોલેજ એન્ડ હોસ્પિટલ, સોલા ખાતે યોજાયેલા ભવ્ય ગ્રેજ્યુએશન સમારોહમાં ડૉ. તન્મય ઈશ્વરભાઈ પટેલે બેચલર ઓફ મેડિસિન અને બેચલર ઓફ સર્જરી (MBBS) ની પદવી સફળતાપૂર્વક પ્રાપ્ત કરી છે.
આ પ્રસંગે તેમણે હિપ્પોક્રેટિક શપથ લઈને માનવસેવામાં જીવન સમર્પિત કરવાનો સંકલ્પ વ્યક્ત કર્યો. દર્દીઓના આરોગ્ય અને કલ્યાણને સર્વોચ્ચ પ્રાથમિકતા આપવી, ગોપનીયતા જાળવવી અને કોઈપણ ભેદભાવ વિના નિષ્ઠાપૂર્વક સેવા આપવાનો સંદેશ આ શપથમાં સમાવિષ્ટ છે.
ડૉ. તન્મય પટેલની આ સિદ્ધિ તેમના પરિવાર, શિક્ષકો અને સમગ્ર સમાજ માટે ગૌરવની બાબત છે. તેઓ ભવિષ્યમાં આરોગ્ય ક્ષેત્રે સેવા આપી સમાજના કલ્યાણમાં મહત્વપૂર્ણ યોગદાન આપશે તેવી આશા વ્યક્ત કરવામાં આવી છે.
આ પ્રસંગે તમામ શુભેચ્છકોએ તેમને હાર્દિક અભિનંદન પાઠવ્યા હતા અને તેમના ઉજ્જવળ ભવિષ્ય માટે શુભકામનાઓ વ્યક્ત કરી હતી.
Comments
Post a Comment