ખેરગામ તાલુકાની નાંધઈ પ્રાથમિક શાળામાં વિશ્વ માતૃભાષા દિવસની ઉજવણી.
નાંધઈ પ્રાથમિક શાળામાં ‘વિશ્વ માતૃભાષા દિવસ’ની અનોખી ઉજવણી : “અંગ્રેજી સારી છે પણ ગુજરાતી મારી છે”ના નાદથી ગુંજ્યું પ્રાંગણ.
નવસારી જિલ્લાના ખેરગામ તાલુકાની નાંધઈ પ્રાથમિક શાળામાં તા. ૨૧ ફેબ્રુઆરી, ૨૦૨૬ના રોજ ‘વિશ્વ માતૃભાષા દિવસ’ની ઉજવણી ઉત્સાહભેર અને સર્જનાત્મક રીતે કરવામાં આવી. કાર્યક્રમનો મુખ્ય હેતુ વિદ્યાર્થીઓમાં માતૃભાષા પ્રત્યે ગૌરવભાવ, લાગણી અને ભાષા પ્રત્યેની સમજ વિકસાવવાનો હતો.
કાર્યક્રમનું મુખ્ય આકર્ષણ લોકનાટ્ય શૈલીમાં રજૂ થયેલું રંગલા-રંગલીનું નાટક રહ્યું. વિદ્યાર્થીઓએ “આજની પેઢી અને માતૃભાષા” તેમજ “અંગ્રેજી સારી છે પણ ગુજરાતી મારી છે” જેવા વિષયો પર અસરકારક અભિનય રજૂ કરી સૌનું મન જીતી લીધું. નાટક દ્વારા અંગ્રેજીના વધતા પ્રભાવ વચ્ચે ગુજરાતી ભાષાની મધુરતા અને સંસ્કૃતિક મહત્ત્વને સુંદર રીતે રજૂ કરવામાં આવ્યું.
વિદ્યાર્થીઓ માટે શબ્દભંડોળ રમત તથા કહેવતો સ્પર્ધાનું આયોજન કરવામાં આવ્યું. ઉપરાંત હાસ્યસભર ટુચકાઓ અને પરંપરાગત લગ્ન ગીતોની પ્રસ્તુતિએ કાર્યક્રમમાં આનંદમય વાતાવરણ સર્જ્યું.
આ અવસરે ઉપસ્થિત સી.આર.સી. ટીનાબહેને માતૃભાષાના સંવર્ધન અંગે પ્રેરણાત્મક ઉદ્દબોધન આપ્યું અને બાળકોની સર્જનાત્મકતાને બિરદાવ્યા. કાર્યક્રમના અંતે શાળાના મુખ્ય શિક્ષક દ્વારા આભારવિધિ સાથે કાર્યક્રમનું સમાપન કરવામાં આવ્યું.
‘વિશ્વ માતૃભાષા દિવસ’ની ઉજવણીની શરૂઆત UNESCO દ્વારા વિશ્વભરમાં ભાષા વૈવિધ્ય અને માતૃભાષાના સંરક્ષણ માટે કરવામાં આવી છે, અને નાંધઈ પ્રાથમિક શાળાનો આ પ્રયાસ તેની સુંદર પ્રતિબિંબરૂપ બની રહ્યો છે.
