નળિયાવાળી શાળાથી આધુનિક શિક્ષણધામ સુધીની સફર : ચંદનબેન પટેલની 38 વર્ષની પ્રેરણાદાયી શિક્ષણસેવા

નળિયાવાળી શાળાથી આધુનિક શિક્ષણધામ સુધીની સફર : ચંદનબેન પટેલની 38 વર્ષની પ્રેરણાદાયી શિક્ષણસેવા

ખેરગામ : ખેરગામ તાલુકાની બહેજકૃતિખડક પ્રાથમિક શાળામાં શિક્ષણક્ષેત્રે લાંબા સમયથી સેવા આપનાર શિક્ષિકા તથા મુખ્ય શિક્ષક ચંદનબેન પટેલની શિક્ષણયાત્રા શિક્ષક સમુદાય અને સમાજ માટે પ્રેરણારૂપ બની છે.

ચંદનબેને પોતાના 38 વર્ષના શિક્ષણજીવન દરમિયાન વિદ્યાર્થીઓના શૈક્ષણિક તેમજ સર્વાંગી વિકાસ માટે સતત પ્રયત્નો કર્યા છે. છેલ્લા 28 વર્ષથી બહેજકૃતિખડક પ્રાથમિક શાળામાં સેવા આપતાં તેમણે મુખ્ય શિક્ષક તરીકે પણ લાંબા સમય સુધી શાળાની જવાબદારી સંભાળી છે.

એક સમયે માત્ર 4 ધોરણ અને 32 વિદ્યાર્થીઓ ધરાવતી શાળાને ધોરણ 8 સુધી વિકસાવવામાં તેમજ શાળાના ભૌતિક અને શૈક્ષણિક વિકાસમાં તેમનું મહત્વપૂર્ણ યોગદાન રહ્યું છે. આજે શાળામાં આશરે 203 વિદ્યાર્થીઓ શિક્ષણ મેળવી રહ્યા છે.

ચંદનબેનના સેવાકાર્યમાં સૌથી નોંધપાત્ર બાબતોમાંની એક એટલે 51 આદિવાસી વિદ્યાર્થીઓ માટે શૈક્ષણિક પ્રવાસનું આયોજન. પોતાના આશરે રૂ. 2 લાખના ખર્ચે તેમણે વિદ્યાર્થીઓને ફ્લાઇટ દ્વારા દિલ્હી, આગ્રા, મથુરા અને વૃંદાવન સહિતના ઐતિહાસિક અને સાંસ્કૃતિક સ્થળોની મુલાકાત કરાવી. આ અનુભવથી વિદ્યાર્થીઓને પુસ્તકીય જ્ઞાનની સાથે દેશના ઐતિહાસિક વારસા અને સંસ્કૃતિને નજીકથી જાણવાની તક મળી.

શાળાના વિકાસ માટે ચંદનબેને ગ્રામજનો અને વાલીઓ સાથે સતત સંવાદ જાળવી રાખ્યો. ગુણવત્તાસભર શિક્ષણ અને વિદ્યાર્થીઓના સર્વાંગી વિકાસના પરિણામે ખેરગામ, ડેબરપાડા, ભૈરવી અને ગૌરી સહિતના ગામોના વાલીઓ પણ પોતાના બાળકોના શિક્ષણ માટે આ શાળાની પસંદગી કરી રહ્યા છે.

ચંદનબેનની શિક્ષણક્ષેત્રે કામગીરીને માન્યતા મળતાં તેમને તાલુકા અને જિલ્લા કક્ષાના શ્રેષ્ઠ શિક્ષક પુરસ્કારથી સન્માનિત કરવામાં આવ્યા છે. ઉપરાંત મહિલા સશક્તિકરણ ક્ષેત્રે પણ તેમને સન્માન પ્રાપ્ત થયું છે.

આ સમગ્ર શિક્ષણયાત્રા એ સંદેશ આપે છે કે શિક્ષકનું કાર્ય માત્ર પાઠ્યપુસ્તક સુધી સીમિત નથી; શિક્ષક વિદ્યાર્થીઓમાં આત્મવિશ્વાસ, સંસ્કાર અને મોટા સપનાં જોવાની હિંમતનું સિંચન પણ કરે છે. ચંદનબેન પટેલની સેવા એ શિક્ષણ પ્રત્યેના સમર્પણ અને સમાજ પ્રત્યેની જવાબદારીનું સુંદર ઉદાહરણ બની છે.