ખેરગામ તાલુકાનું ગૌરવ: નાંધઈ પ્રાથમિક શાળા સક્ષમ શાળા પુરસ્કાર 2024-25માં તાલુકામાં પ્રથમ સ્થાને.
નવસારી, ગુજરાત: નવસારી જિલ્લા પંચાયત શિક્ષણ સમિતિ દ્વારા આયોજિત "સક્ષમ શાળા પુરસ્કાર 2024-25" વિતરણ સમારોહમાં ખેરગામ તાલુકાની નાંધઈ પ્રાથમિક શાળાએ તાલુકા કક્ષાએ પ્રથમ સ્થાન મેળવીને તાલુકાનું ગૌરવ વધાર્યું છે. આ કાર્યક્રમ કાલિયાવાડીની સંસ્કાર સમૃદ્ધિ હાઈસ્કૂલમાં યોજાયો હતો, જ્યાં જિલ્લાની ૧૫ શાળાઓને તેમની ઉત્કૃષ્ટ કામગીરી માટે સન્માનિત કરવામાં આવી.
સમારોહના અધ્યક્ષસ્થાને કલેક્ટરશ્રી ક્ષિપ્રા આગ્રે મેડમ અને જિલ્લા વિકાસ અધિકારીશ્રી પુષ્પલતા મેડમ હતા. તેઓની ઉપસ્થિતિમાં શાળાઓને સ્વચ્છતા, હરિયાળી, સલામતી અને સક્ષમતાના માપદંડો પર આધારિત પુરસ્કારો આપવામાં આવ્યા. આમાં પ્રાથમિક, માધ્યમિક, ગ્રામ્ય, શહેરી અને નિવાસી શાળાઓનો સમાવેશ થયો હતો. કુલ ૯ શાળાઓને જિલ્લા કક્ષાએ અને ૬ને તાલુકા કક્ષાએ વિજેતા જાહેર કરી પ્રમાણપત્રો, ટ્રોફી અને પ્રોત્સાહક ઇનામો એનાયત કરાયા.
કલેક્ટરશ્રી ક્ષિપ્રા આગ્રેએ તેમના ઉદ્બોધનમાં શિક્ષકો અને વિદ્યાર્થીઓને પ્રોત્સાહિત કરતાં કહ્યું કે, "શિક્ષણમાં આધુનિક ટેક્નોલોજી અને પરંપરાગત પદ્ધતિઓ વચ્ચેનું સંતુલન જરૂરી છે. સરકારની 'સક્ષમ શાળા' પહેલ વિદ્યાર્થીઓના વિકાસ માટે મહત્વપૂર્ણ છે." તેઓએ આગામી વર્ષોમાં વધુ શાળાઓને તંદુરસ્ત હરીફાઈમાં ભાગ લેવા આહ્વાન કર્યું.
જિલ્લા વિકાસ અધિકારીશ્રી પુષ્પલતાએ જુની અને નવી શિક્ષણ પદ્ધતિઓને સંતુલિત કરવા પર ભાર મૂક્યો અને સ્માર્ટ શિક્ષણમાં મૂળભૂત પાયાને ભૂલવું નહીં તેની તકેદારી રાખવા શિક્ષકોને માર્ગદર્શન આપ્યું.
જિલ્લા પ્રાથમિક શિક્ષણાધિકારી ડૉ. અરુણકુમાર અગ્રવાલે વિજેતા શાળાઓને અભિનંદન પાઠવ્યા અને ગુણવત્તાપૂર્ણ શિક્ષણ માટે પ્રયત્નશીલ રહેવા જણાવ્યું. કાર્યક્રમમાં જિલ્લા શિક્ષણાધિકારી જયેશ ચૌધરી સહિત અનેક મહાનુભાવો, આચાર્યો અને વિદ્યાર્થીઓ ઉપસ્થિત રહ્યા.
આ પુરસ્કારો શિક્ષણ ક્ષેત્રમાં નવી ઉર્જા ભરે છે અને સ્વચ્છ, હરિયાળી વાતાવરણમાં ગુણવત્તાયુક્ત શિક્ષણનું મહત્વ દર્શાવે છે. નવસારી જિલ્લો આવા પ્રયાસોથી શિક્ષણમાં આગળ વધી રહ્યો છે.
ખેરગામ તાલુકા પ્રાથમિક શિક્ષણાધિકારીશ્રી મનીષભાઈ પરમાર સાહેબ, ખેરગામ તાલુકા કેળવણી નિરીક્ષકશ્રી પ્રશાંતભાઈ પટેલ, બી.આર.સી. વિજયભાઈ પટેલ અને ખેરગામ પ્રાથમિક શિક્ષક સંઘના પ્રમુખ શ્રી દિવ્યેશકુમાર ચૌહાણ તથા મહામંત્રીશ્રી કિરીટભાઈ પટેલ સહિત હોદ્દેદારોએ હાર્દિક શુભકામનાઓ પાઠવી હતી.
